Ngayon ko lang napagtanto ang kasabihan sa Ingles na, "Time flies when you're having fun." Hindi ba't mabilis din dumaan ang panahon kahit hindi ka masyadong nagsasaya. Isang malaki at "obvious" sa ehemplo ay ang aking buhay kolehiyo. (Hindi ko kasi sigurado kung pati ba ang kapwa kong estudyante ay nabibilisan sa takbo ng panahaon.) Hindi ko man lang namalayan na isang taon na lamang ay magtatapos na ako, at isang taon na lamang ang nalalabi upang mabuo ko ang aking pag-i-isip ukol sa planong pag-aaral ng Medisina. Isang taon na lang at hindi pa rin ako masyadong sigurado sa aking buhay. Isang taon na lang at tila wala pa rin akong nagagagawang matino.
Balik ako sa "Time flies when you're having fun." Nasabi ko nga na mabilis din ang pagdaan ng panahon kahit hindi ka nagsasaya. Ang aking buhay kolehiyo ay hindi naman puno ng kasiyahan. Maraming gabi ang dumadaan nang hindi ako natutulog. Maraming umaga ang pinagtatakahan ko kung nakatulog nga ba ako. Maraming oras ang ginugugol ko sa silid-aklatan at ang masama pa, pagka-uwi ay ipagpipilitan ng aking magulang na nagbulakbol lang ako. Sana nga.
Sa lahat ng pagpila sa photocopying machines, sa mahahapding mata kakabasa ng mga sinaunang libro, sa masasakit na balikat dahil sa kabigatan ng bag, sa paglangoy ng utak sa sobrang dami ng pinag-aaralan, sa pagkahilo dahil sa paglipas ng gutom, sa gutom na sikmura, sa ilang gabi ng cramming, sa pangangalay ng mga daliri kakasulat, sa pagkakaroon ng kalyo at paglaki ng hita kakalakad, masaya pa rin ang buhay kolehiyo. Dahil sa lahat ng ito, kasama ko ang aking mga kaibigan. At dahil sa kanila, masasabi ko na siguro nga time flies faster when you're having fun.
_____________________________________
Two roads divereged in a wood, and I-
I took the one less traveled by,
And that has made all the difference.
- Road Not Taken by Robert Frost
